نحب نعرف

الحرمان من الحرية ولاّ الحبس (احتفاظ، إيقاف ولاّ عقوبة) هو تنفيذ لقرار ولاّ حكم قضائي صادر إما من وكيل الجمهورية ولاّ من قاضي تحقيق ولاّ من المحكمة.

الشرطة (بوليس، حرس وإلاّ سجون وإصلاح) هي الي تنفذ القرارات والأحكام هذي بدون مبالغة ويراقبها في هذا السلطة القضائية. يعني إذا صدر منهم أي تجاوز ولاّ انتهاكات ينجم المتضرر إنو يقدم شكاية لوكيل الجمهورية باش ينظر في الموضوع.

بصفة عامة الاحتفاظ بأي شخص ولاّ إيقافو ولاّ سجنو ما ينجّم يصير كان من طرف السّلط المختصّة إلّي خوّللها القانون الصلاحيات هاذي ولازم وقتلّي يقومو بالمهمة متاعهم يكونو  يكونو ظاهرين عن طريق الزّي إلّي لابسينو ولاّ أي إشارة يحملوها ولازم يكون عندهم الإذن باش يشدّو الشخص ويحتجزوه.

هاذاكا علاش القانون لازم يحدّد السلط هاذي ويوضّح صلاحياتهم ويعاقب أي تجاوز يمكن يصير ويحدّد زادة السلط إلّي تراقبهم في تنفيذ الصلاحيات إلّي عطاهالهم.

الحرمان من الحرية لازم يكون عندو مبرّر قانوني وما يمكنش حبس الأشخاص لجمع معلومات فقط لازم تكون الشخص حولو شبهات قوية إنّو يكون مرتكب جريمة.