المحامي
شريك في إقامة العدل ويدافع عن الحريات والحقوق.
»» شنيّة صلاحيّاتو؟
- ينوب الأطراف في القضية مهما كانت وضعيّتهم (مرتكب الجريمة ولاّ المتضرّر) ويدافع عليهم ويحافظ على حقوقهم ويحضر معاهم وينصحهم ويقوم بجميع الإجراءات اللازمة قدام مختلف الهياكل المتدخّلة في سير الاجراءات الجزائية
- في إطار قيامو بخدمتو لازم عليه يحترم قواعد وأخلاق المهنة وخاصة في علاقتو مع موّكلو
- يعاون الأشخاص إلّي ما عندهم الإمكانيات باش يكون عندهم شكون يدافع عليهم في إطار الإعانة العدلية ولاّ التسخير
- إنابتو في القضايا الجنائية إجبارية
- يقوم بدور مهم في الدفاع على حقوق منوّب والحفاظ على مصالحو من كل خرق للقانون ولاّ للإجراءات
- دورو مهمّ حتى بعد التصريح بالحكم ويتبع إجراءات تنفيذو وظروفها ويسعى باش يمكّن منوّبو من التمتّع بالحقوق والضمانات إلّي ينص عليها القانون
- لازم تكون عندو خبرة و دراية بأهداف مهنتو وأخلاقياتها، وبحقوق الإنسان والحريات الأساسية التي يكرّسها القانون الوطني والدولي.
- باش ينجّم يمارس المهنة في تونس، لازم يكون مسجّل عند الهيئة الوطنية للمحامين.
»» شنوّة تكوينو؟
- رجل قانون (تكوين في الحقوق).
- قبل ما يمارس المهنة يتلقّى تكوين لمدّة عامين في المعهد الأعلى للمحاماة باش يتحصّل على شهادة الكفاءة لمهنة المحاماة
- كي يبدا متحصل على شهادة الدكتوراه في الحقوق ولاّ العلوم القانونية ولاّ عندو رتبة أستاذ تعليم عال أو أستاذ محاضر في القانون ينجّم يمارس المهنة من غير ما يتكوّن في المعهد
»» الشركاء الأساسيين
- أعضاء النيابة العموية
- مأموري الضابطة العدلية
- قاضي التحقيق
- قضاة الجلسة
- كاتب المحكمة
- الخبراء العدليين
- قاضي تنفيذ العقوبات
- أعوان السجون